معانا النهاردة شاعرين متميزين جدا وهما :
الشاعر: Mohamed Abdelfatah
الشاعر: الشاعر احمد الجبلاوي
علاقة تودي لـ علاقه
متاهه تودي لـ متاهه
حاولت كتير و مقدرتش
و رب الكعبة أنساها
الحب عدي وخد حياه وياه
والعين ضريره والعيون أفواه
انا عشت ليها وبيها ومعاها
كانت معايا بس ، قلب معاه
مشكلتي عايش فـ الحياة طيب
قلبي الضعيف لجراحها بِيطّيب
ربك يا حلوة ميزانه إسمه العدل
الحق حق و عُمره ما يسّيب
منحسش مُر الشوق غير بعد
ما نلقي الشوق أصبح مُهلك
والخير الي بنتبرع بيه
أصبح مَهلك
فبنسمع صوت جوانا يقول
كل الي حصلك من جهلك
فنعود مجاريح
بنعود مجاريح !
بنعود لـ ضريح
الوحده و أسبابها السامه
بالله يا صديق
لـ تقولي طريق
أمشيه منغير ما يكون ضلمه
ف طريق جواك اسمه العزلة
بيودي علي البُعد الأبعد
هتشوف الدنيا بطبيعتها
وهتبقي اليك صاحب اوحد
مش عاوز صاحب و لا حاجه
لو فاكر نفسك تعرفني
والله ما تعرف ولا حاجه
انا واحد اكبر من سني
انا واحد ميت بسذاجه
صاحب ولا انك ، ترضي وتدادي
ويقولوا بردوا مفيش فقربك امل
ف ان مهما زعلوا ، وقالوا مش باقين
باب الفؤاد واسع يفوت جمل !
هي الحياه بنت الكلاب هي
أفلام و سيما و قصة هزليه
أبطال حياتي كلهم أبطال
لكن في قصة عظيمه مش ليا
الروح ضريرة والقُليب مصلوب
والحب نخله والفراق الطوب
عنتر زمانه ف الزمان دا ينام
فوق المخده كل ليل مغلو
عنتر زمانه ده كان زمان و زمان
براحه طيب عـ القلوب علشان
في ناس بتقرا الشعر بقلوبهم
مش بس قافية و عظمه فـ الاوزان
عنتر ياصحبي جوا فجوانحي
خاض الحروب جوايا لكن باش
كسّر سيوف الحرف قدامها
لكن ياصحبي دبحي كان بطناش
سلم امورك كلها لله
شارك كاسات البن في المأساه
أبكي القصايد دون وجود الكسر
الكسر جوه و هي دي المعاناه
راضي بحكمه بس كيف انسي
وفراقها كانسر وانتشر فيا
طب يعني ايه ف الدنيا باقيلي
بعد اما كانت كل شئ ليا
أنساها و عيش زي ما نسيت
و اقسي انت كمان زي ما قسيت
دي حكاية مصيرها مصير مجهول
مكانتش من الاول حصلت
بنحب بقلب نضيف يمكن
أو يمكن بنخاف نتصاحب
ولحد الان انا ليا مكان
لكن فبديل اسمه الصاحب
انا صاحب جدا لـ سريري
والدمع اللي مصاحب عيني
الشمع مساحش علي التورته
الشمع بيحرق في جبيني
ختاماً
الشعر مَرسي للي خانه الامل
الشعر شربه للي كان ظمآن
واحب اقول للي خانوه البشر
الشعر صاحب بس عمروا ما خان