بعد السكران ما يفوق
الحلوة قالت .. ماله ده
فارد جناحه في الفضا وراسم خطاه
اما اعرفه
وازرع جناينه واخطفه
واطلب رضاه
تسلية بردو ومعرفه
رسم و صفة
بكرة هيلحس الارصفة
علشان اخلي الـ لا اه
الواد بسيط
ولا جاش في باله
شادد رحاله ومكانش بيأمن وراه
شارد في عينها اللي اكتشف منها البكا
طايح في حضن معلقه و جارح صباه
امنتها
ومقام نبينا المصطفى
حلفتها
بحق نور اللي اصطفاه
تضم قلبي اللي اتأذى
وتصون لقانا و ليل صفاه
قتلتني و في ليلة العزا
قالت و متصلوش وراه
على ايه يا ست !
على ايه و ليه
هو احنا داخلين معركة .!؟
امنت طين الباشا والدك
وانتي جاية ترديهالي .؟
بيني وبينك دم يعني ولا تار !؟
مش يوم ما شوفتيني ابتسمتي
وقيدتي نار
مش ده صباعك اللي شاور
مش دة خيالك اللي ناور
مش ده لسانك اللي حاور
لجلي خلق وناس كتار
طب ايه بقى
ولا انتي أكل و بحلقة
عجباكي حاجة
يا تشتريها يا روحي
عماله ليه تطوحي
ولا انتي متربية تاخدي و تشطحي
وترمي و دادي يجيب جديد
انزفك شعر و قصايد
و احكي للناس غنوتك
امدح بصوتي محبتك وافرد في توبك
بتحدى نوري بضلمتك و أستر عيوبك
وانتي التهم متجهزة صفين طوال
خاين و وضيع
وكذا وكذا وسفيه وضال
وانتي الأمان والاحترام
وانتي التمام والمايرام
انتي اللي صلحتي الترام
وانا اللي وقفت النضال
على ايه يا ست
ما نفضها
بفرة مناهدة نرلها وشكرا سلام
منغير كلام
من غير ما نهري في مين غلط او مين تمام
دلوقتي فعلا مستعد اني امسحك
مسحة عظيمة تريحك من ذكرياتي
سكران و فوقت و خمرتي
كانت وجودك يا حياتي
ياللي جيبالي الكلام والغمز واللمز السخيف
و ان كان على لحس الرصيف
اديه بقى صف مرايات
و ان كان على الحزن اللطيف
دول مش صوابعي
دول نايات
وانا بعترفلك بالصواب في كل شئ
انتي الأماكن و الطريق
و انتي الطريق الدولي و الفرع البطئ
انتي علامة النصر
صوت الحب
سيدة الغناء العربي
و الوجه الرقيق
و انا
زكي رستم
هتلر ، موسوليني
تشرشل
متعالي ، فضولي ، اناني
ومش مظبوط وبذئ
عادي
وانتي بتقولي لصحابك اد ايه انا شخص قاسي
و ان طبعي في غاية السئاله
ابقي قولي ان انا سبب البطاله
سبب انخفاض منسوب مياه النيل
وان وقتك
ضاع في تخفيف دمي التقيل
و ان زوقي كله زوقك
واني بتمرمغ في شوقك
بس جاحد
اشتميني تعلي مني
ذمى سيرتي هتمدحيني
طلعي الطبع اللي فيكي و فرحيني
دول كاسين منقوعهم ايه اللي يجيبوني
ارمي عمري ما بين اديكي و اقول يا دوب
خمرة ايه اللي تاخدني لواحدة بتكسر قلوب
كنت بستحمل مصايب
مش ببين
كنت رغم الشدة لين
عشت اقول على الغلطة وردة
كنت اشوف الشوكة وردة
و اوصف القاسي انه هين
سكر بين
هانج اوفر
كنتي ليه في هدومي رقعة
وقلبي معمولك بلوفر
كنت مش بصعب عليكي وانتي بتلمي السيناريو
وتنشريه
كل شئ من قلبي عامله تكدبيه
ده انتي شككتيني فيا لدرجة اني
قولت كتر خيرها واخده بالها مني
و انتي ابعد واحدة عني
اللي عاش يبوس اديكي عشان تضلي
جاي يبوسها عشان توريه التخلي
اللي طول العمر بيقولك هينفع
جاي يقولك مش هينفع
السنين اللي اترموا في الأرض حتى مش هتشفع
قولي ان انتي اللي سايبة
وان انا مصاص دماء و انتي غلبانة بغباء
و عبيطة خايبه
واني جيبتك بالطريقة
و ان اغراضي دنيئة
وان خطواتي بطيئة والحبال في الوصل دايبة
اللي عاوزاه يتعمل
يتعمل و تحلي عني
عاوز ارجع للي راح في الزحمة مني
عاوز اكسر وحدتي واخرج براسي
عاوز اوهب مركبي لغير المراسي
ارمي للأيام شراعي
و اتركه للناس تراعي
القى منهم كلمة تفرح
حد من الناس اللي خسرانهم عشانك
يجي ويحل في مكانك يبتسملي ويملى عيني
عاوز اسمع حد بيقول اني طيب
و اني لسة قلبي صافي
حد يمشي في روحي حافي وهو آمن
واحدة تحلفلي ان ممكن يجي بكرة
انتي مش غلطانه فيا
كله غلطي
كله كان زرعي و حصادي
قلبي بعد سنين معشش
صاحي فاضي
واتكسر كاسيك في إيدى و خمره طار
النهارده انا خدت بالي من النهار
خدت بالي من ملامحي
ثغري باسم
لوني ممحي
قلبي عيل
النهارده
التأم جوايا جرح مكانش هين او قليل
فوقت بعد ما وقت فات
بس فوقت
بالسلامة
سايبة فيا علامة عادي فيها ايه ما تسيب علامة
بس سابت بعد منها
حد اطيب من سنينها
حد مش هتشوفه عينها
من هنا ليوم القيامة
بعد السكران ما يفوق