حزين يا رب
حزين بشكل حزين
كل اللي عاشرتهم
مش مخلوقين من طين
دول مخلوقين من نار
عزفوني يستمتعوا
و قبل ما يودعوا
قطعوني م الأوتار
أباليس ولاد أباليس
بـ يموتوا في جراحي
طيرتهم م الفرح
قاموا قصقصوا جناحي
و انا حقي مش هيضيع
عارفك يا رب سميع
هتلبي و تحقق
و هتشفي قلب عليل
م الهجر متشقق
واثق فـ عونك أوي
واثق أوي مصدق
إن اللي جاي مش حزن
أو كبت زي زمان
و إن البشر كلهم
مفهومش كام "إنسان"
و إن البشر كترهم
أسوأ من النقصان
و إن اللي فات هيعود
و البركة في الموجود
مش في اللي راح مني
ولو إتظلمت كتير
عمرك ما تظلمني
هتجيبلي حقي و حق ناس مني هيتاخد
"علشان لكل أجلٍ كتاب بـ يرتبه الواحد"
