قبل الآوان ما يفوت
كلمات القصيدة
هيقولوا بعد ما أموت ..
بنحبة والله ..
كان شخص شهم و جدع وكان ابن ناس و نبيل
كان عنده ذوق وجميل ..
وهيحكوا بالتفصيل عن كل يوم عشناه
ويقولوا عشنا معاه .. وقسمنا ملح وعيش
وكان ابن موت واتخطف من وسطنا ف مفيش
وصوان عزايا هيقفل الشارع
وصلاة جنازتي هتزحم الجامع ..
وانا هبقى شايف كل ده وسامع ..
وكأني لسه ف وسطكم وبعيش
يوم جنازتى هتلقي ناس .. عدوا ف حياتي
من سنين معرفش عنهم أي حاجه ..
من اللي كان فى الفصل جنبي من البدايه
واللي كان في الجامعه بيذاكر معايا
واللي مره لعبنا كوره
واللي جمعت بنا صوره
واللي كان ديماً يجيلي
واللي كان فى الجيش زميلي
واللي سافر من زمان
والقرايب و الحبايب و المعارف و الجيران
كل واحد كنت عارفه وكان عارفني ..
كل واحد عدي فيا وخد مكان !
كل قصه حب بدأت .. وانتهت بنهايه بارده
تيجي بنت زمان سابتني جنب قبري تحط ورده
كلهم هيحسوا بالحب المفاجئ ..
كلهم هيقولوا عني بإني طيب ..
واما يفتكروا اننا من سن واحد ..
ياخدوا بالهم ان ملك الموت قريب
فاللى قصر في الصلاة هيتوب شويه ..
واللي مستحلي الغلط .. هيفوق شويه
بعد فتره كل حاجة أكيد هترجع هي هي
اللي فاق يرجع يقصر
واللي تاب .. يرجع يتوه
كاس وكل الناس مسيرهم يشربوه
الا أهلى
اهلى هيحسوا بغيابي .. ف كل ثانيه
امي بعد ما اموت هتبقي في دنيا تانيه
يعني مثلاً
كل يوم هتخش أوضتي .. بس مش هتقولي " قوم "
مش هتفضل بتاعتبني ان نص حياتي نوم
مش هتلقى اللى يساعدها لم تعمل اى حاجه
مش هتلقى اللي يعاتبها لو مغسلتش الهدوم
مش هتلقي اللي يناكفها .. أو يبرطم بالكلام
فيه مكان ع السفره فاضي .. كنا كام وبقينا كام ؟!
اختى كل ما تكوى حاجة هتفتكرني ..
كنت رامي الحمل كله عليها هىكل حاجه ف بيتنا هتفكرها بيا
كل ما ترتب دولابي كل ما تروق سريري
واما هتعوز تحكي حاجه مش هتحكي لحد غيري
حتي أبويا ..
اللي عمري ما شفته دمع
مش هتنشف يوم عنيه
لو يقابل حد صحبي .. هيحضنه ويحضني فيه
يفتكرني ف كل واحد كان عرفني ..
او يشوفني ف أخويا لما يبص ليه !
لما أموت .. هتحب جداً ..
حب كنت أتمني أشوفه و أحس بيه
انا لسه عايش وسطكم .. وصحيح مجاش وقتي
حبوني دلوقتي ..
قبل الآوان ما يفوت انا نفسى أحس بحبكم ليا
حبوني قبل ما أموت ..