برج الخليفة
من فوق برج الخليفة
هاتشوف الأرض كوره
من تحت البرج طبعا
هاتشوف الأرض أرض
لو كنت ف يوم جنايني
هاتشوف الورد دنيا
لكن لو كنت عاشق
هاتشوف الدنيا ورد
في ديسمبر -وانت روسي
هتكون حران عذاب
في ديسمبر -وانت مصري
تلبس كل الدولاب
في قلوب مرت بأزمه
مسكوا ف بعضيهم اكتر
وقلوب مرت بأزمه
ف ارتاحت ل الغياب
الشيء قد يبقى نفسه
وانا اشوفه بنظره غيرك
دا لأن العين بتنظر
من كادر مرتحاله
ف حبيبتي من مكانك
هاتشوفها جميله عادي
لكن لو جيت مكاني
هاتشوفها الكون بحاله !