ماحبيتهاش
كدبت الكدبة على نفسك واديك صَدّقت
كانت شايفاك حياة كاملة وكُنت شايفها حَبة وَقت
لا قَلبك شالّها جِميلة
ولا كِتفك فـِ يوم شالها
وكُنت رايحلها عارف بإنك مش هَتبقالها
واديك بَعد اللي كان بينكم
مشيت ناسي اللي كان بينكم .. كأنه ماجاش
نسيت حَتى انها وِقفت بتترجاك ماتقتلهاش
ماحبيتهاش
لكن جايز تكون حبيت وجودها معاك
وحَبيت انها فـِ ضهرك .. حيطان ضد الوجع سانداك
تنام انت
وتفضل هي ع التليفون
بتحرس نَفَسك الخارج وتعمل من ودانها عيون
بتضحكلك ولو حَتى الهزار بايخ
بتختارلك معاك لِبسك، وحتى أقل تفصيلة
ورغم ان انت عِشت تزوّر الإحساس
كانت لما انت تتألم .. يعيّط قَلبها ويصحي كُل الناس
منين جيتها
ولما انت مافيش جواك شعور طيّب
فضلت معاها لية طيب
ولية كلمتها عَن بيت وعن عيلة
مادمت مافيش نوايا انك تشيل عَن كتفها الشيلة
مفكر اية ؟ ..
فاكرها هَتنسى جَرح زمان وكل اللي اتحكى واتعاش
ساعات الذاكرة بتخدع .. لكنّ القلب مابينساش !
ماحبيتهاش … !