أميرة البيلي - وصيتي ليكم
معرفش امتى هينتهي عمري
و هروح اقابل يومها رب كريم
لكن عشان الوقت مش مضمون
ف انا تاركه ليكوا وصيتي بشِعري
لو كان ميعادى جي عايزاكم
تفتكروا ليا الخير وتمشولي
انا ياما كنت لوحدى والله
ووقفت جوا الحرب وبطولي
فـ بلاش في موتي
تنسوا ايامي وبلاش في قبري
تنسوا تدعولي
علي قد ما انتوا هتوحشوني بجد
في ناس كلامي معاها كان علي القد
لكني واثقة بإنهم صادقين
وفي كام صديق اقربلي من نفسي
وبقول في نفسي هسيب صحابي لمين
في ناس حقيقي هتبكي من قلبها
ويقولوا عني كان في خفة ضيف
وفي ناس دموعها هتبقى كدابة
ومشاعرها ليا هتبقى غش وزيف
لو كان صديقي هتعرفوه فـ واسوه
هيبان في عينه الصدمة والكتمان
اما المنافق عينه مبتبكيش
الا اذا شافت كاميرا في اي مكان
عشت في حياتي طيبة وصادقة
مش عايزة غير الحب بعد ما أنام
عايزة في وداعي امي متعيطش
وابويا هو اللي يصلي أمام
واخواتي هما اللي يشيلوا النعش
وواسوا اهلى لإن دول بالذات
هما المشاعر اللي صادقة وخام
امشوا في جنازتي بدون صراخ ونواح
وادعولي أكون ف الجنة ليا مكان
لو دوري جي اتأكدوا
إني معيبتش حد طول عمري
وإني مردتش الأذى لمخلوق
ومسيبتش الا الخير ووالله
عمري ما كنت فـ يوم قليلة ذوق
انا كنت باخد حقي في سجودي
واللي إذاني من أذاه بيدوق
عيشت فـ حياتي مأمنة ومسلمة
ان اللي يعرف ربنا بيفوق
ويقيني فيه والله مخذلنيش
وعشان كدة عيشت وهموت وانا فوق
لو دوري جي
هيعيش كلامي وعيشوه بينكم
ونصايحي ليكم ( ربنا ودينكم )
اياكوا يوم الحزن يسجنكم
والخير هيبقى وربنا بيحميه
انا ياما نمت بدمعى فـ عيوني
وصحيت بقلبي وربنا منجيه
وعشان كلامي هيبقى بعديا
فـ الخلق سيرة وكلمتك سيفك
والوعد ضيفك أكرمه بالفعِل
واللي يخِل في عهده مش خِلك
واللي يِغل في هجره " بينافق"
في فرق بين الصاحب اللي بجد
او حد بيرافق
قال المنافق صعب تعرفني
وهتعرفه لما انت تتكافئ
ونصيحتي ليك
ارحم ضعيف وبلاش تكون ضده
ازاي هتلقي الخير لو كنت بتسده
الدنيا دين وهيجي وتسده
والظالم اللي ينام ملوش جنة
حق العباد عداد اذا ماعفوش
واللي أذاك ، ربك بيمهل بس ماهملوش
الحق عند الحق ميروحش
واللي في قلوبهم ربنا مخسروش
وصيتي ليك
تفضل فاكرلي الخير
وان جيت في بالك يوم
تدعيلي من قلبك
وادعيلي بالمغفرة لو كنت يوم قصرت
بحق شِعري وقصايدي
لو كانوا يوم جنبك
وصيتي ليكم
تزوروني ومتنسوش
علشان بخاف من الوحِدة والضلمة
وافتكروا اني بحبكم ديماً
واني في حياتي ما كنت يوم ظالمة
ومتنسونيش
وختامي ليكم ، حبكم واصل
وعارفة إني بعد موتي هعيش