الحنين
قالوا مرة كل حزن نهايته فرحه
وكل كسر مسيره يتداوي
واديني مستني
جوايا طفل عمال بيصرخ م الوجع
جوايا كهل علي فراش الموت
جوايا شخص اصم عمال بيبكي من كتر السكوت
ومفيش ونس إلا القصيدة وجرحها
ومفيش نجاه من الخوف
القشة ودتني المهالك منجدتنيش
قطمت في ضهري قالتلي مش هتعيش
مش كل قشة بتنجد الغرقان
علشان كدة كل الطرق نهايتها كات توهه
كل الصحاب اتحولوا لخذلان
مرض الفراق مش زي دور البرد
مرض الفراق يشبه أوي السرطان
وكيماوي قلبك لو م البشر هيضر
حالك هيفضل بردوا مش بيسر
كل الشغف جواك مامتش موته حر
ولا موته تُحسب لك
مات من غبائك ف اختيار الناس
ازاي تفضفض للي موت فيك
وازاي هتشكي من ألم سمه
من امتي يعني الحزن بالاسود
من امتي في جارح بيحس علي دمه ؟
مش شرط ابكيلك علشان تصدقني
الفرقة فعلا عارفة تحرقني
وزهقت ادور علي العلاج
الجرح اوفي من الكلاب
حالف ما يتركني
ولا حتي ناوي يلم
ازاي هحاول انسي احزاني
وانا كل يوم ببكي وبموت من السم
الضرب ف الميت حرام
والضربتين ف الراس مآسي
مش عدل ابقي بوهبك روحي
وانت بتغزل حزن لمقاسي
مش عدل ابقي ب قلب أم معاك
وانت بتتعلم في روحي ازاي تكون قاسي
الضرب ف الميت حرام
والخمرة صعبة انها تنسيك
كتر السجاير هيدمر الصدر اللي فيك
ازاي هيجيي الشفا من كترة الدخان
وازاي هتقدر تنسي مرارة الخذلان
وازاي هتعرف تبتسم تاني!
اصعب معاني الجرح ان انت
تفضل لوحدك لسة بتعاني
" اعتزل ما يؤذيك "
مشيت ومنسيتشي
حاولت والله ، بس الحنين قاتل
عمال بماطل في الفرح وابكي
واقوله بكرة نعود
ملعون أبوها وعود
خليتني اخاف من الجي
والاقاني لسة بحن
الشوق كما السكاكين
بيقطعوا ف روحك
كحول جبته ف مال علي جروحك
خليني اوصفلك بشكل ادق
الشوق بيشبه شق ف مبني آيل للسقوط
الشوق بييجي لجرح متغطاش
علشان وقتها م الصعب تمنع الحنين جواك
والقلب لسة ف غرفة الانعاش
واديني مستني
أعرف قلوب متكونش يوم جارحه
او ان حزني ينتهي وادمع من الفرحة
هل الشتا وجايب معاه
كل الوجع والذكريات المؤلمة
هل الشتا وشايل معاه
اشياء كتيرة معلمة
كان السحاب حالف يدمع من الفراق
علي شكر امطار نبتت
وجع اللي فات من حبنا
هل الشتا ومعرفش ليه
خلاني ارجع افتكر
واكتب إليك الشعر من تاني
مش ذنب قلبي انه مستني اللقا
ولا ذنب قلبك انه مش فارق معاه
سنة حياة .. ومبشتكيش
انا يعني يكفيني ان انت بس تعيش
كان نفسي تبقالي
كان نفسي نبني ف بيتنا م الاحلام
ونطير سوا ف عز المطر ونحب
كان نفسي قطر الخوف ميسرقناش
نفضل سوا ونشب ..
علشان كدة بكتب
مين بس غير الورق ينفع اقوله انك وحشني
بدون ما يرد بعتابه
وأدي الشتا دقيت علي بابه وياريته ما فتح لي
فكرني بيك!
وبضحكتك ساعة المطر
بالرقص والليل والسهر
وبكل شئ بينا اختفي
والله قلبي اللي انطفي
واهي روحي لسة مضلمة
هل الشتا وجايب معاه
كل الوجع والذكريات المؤلمة ..
لسعة اكتوبر مصابتش جسمي المرة دية
انا قلبي هو اللي ارتعش م البرد
كان السحاب في الشتا عيني
كان المطر بكايا من دونك
المرة دى مقدرتش استني الشتا
علشان البس جاكتك
معرفتش ارقص ف المطر وحدي
بقيت بروح للبحر من غير ايديك
واحكيله عنك بالقسي واللوم
بقيت بستني اخر اليوم
كأني بنهي المعركة بالنوم
وحشتني ..
بقالي شهور بنتصر للكبرياء
واهو جه الشتا
وقلبي انتفض من البرد
مكنش عدل أن انت تأذيني
ف اضطر ألجأ للفراق
واسيب ايديك بترتعش بعدي
ومكنش ينفع اختار أذيتي معاك
علشان تعيش انت!
هي الحياة بنت الوجع
بتسيبنا نختار الوجع ف نموت
مُصيرين علي فكرة للأحزان
بنسيب قلوبنا بضعف
وبنفس ضعف قلوبنا بنكابر
ونختار الطريق الصعب
رغم اليقين بأنه هينتهي
وهينهي كل شغفنا بالتدريج
ف بننتصر للكبرياء
ونلاقي روحنا مُخيرة اما الوجع
اما الرحيل ..
واهو جه الشتا وزاد الوجع م الاشتياق
اختارت ليه تكون الاناني ف نفترق؟
اختارت ليه نفسك!
ما كان زمانا بنحتفل بالشتا
من غير ما تبكي القهوة من غيرنا
من غير ما يسمع كل واحد مننا فيروز لوحده
من غير ما اروح حفلة عمر خيرت من غير ايديك!
مش كان زمانا بنختلف علي لون عينيك..
وصلنا ليه للنقطة دية؟
مانت عارف اني مبسامحش ف أذيتي
واني عندي كرامة كان لازم تعيش
كانت عينيك بتقولي اوعي ترحلي
كانت ايديك ماسكة ف ايديا بخوف
لكن لحزن الحظ انانيتك
اكبر كتير من حبنا
وعشان كدة صحي الشتا
جوايا حبك من جديد
معرفتش امنع شِعري م الفضفضة
معرفتش امنع قلمي يبكي بسرد
وعلشان كدة
المرة دية ..
انا قلبي هو اللي ارتعش من البرد