خفيف جدا
رضيت بالهم
والهم ورب الكعبة مش راضي
نسيت الحلم
هعيش العمر ده لوحدي و عـ الفاضي
هعيش فـ الوهم
و هنجح بس في خيالي
هجيب أطفال
مجاز راح يبقوا أطفالي
هعيش وحدي
بدون ما يكونلي حد شريك
هبيع نفسي
لأول من يقولي شاريك
متستغربش مـ المعناه
أنا كاتم في جوفي الأه
من الايام
من الاحلام
من الأشغال
وفوق طاقتي حمولي جبال
بغيب قد أما أغيب لكن
مجيش أبدا فـ يوم عـ البال
خفيف جدا
بـ اعدي خفيف
وتسمعني .. كلامي لطيف
لا أميل للكدب والتحريف
أنا عندي الكلام موزون
صاحبت المعده و القولون
بقيت بصرف عليها فلوس
لو اتشالت
تجيب الشقه و الحلوة
مفيش حلوة هترضي تكون
شريكة لحد يشبهلي
انا بالظبط بالمللي
جنيه فضه
لكن صدي مع الايام
ببيع الوهم للاحلام و أصدقني
و طفل برئ برغم من اكتمال دقني
بسابق حزني يلحقني و بمسك فيه
انا واحد من العايشين
ما تفرق ليهم الدنيا
و تاهوا في البراح و التيه
مزيج طيب مـ الأحزان
وواخدين مـ الحياه سوكسيه
بنشرب خُزن في الفنجان
و دمع الحزن وش عليه
انا واحد من العايشين
برائة الدنيا دي في عنيه