الحلم هيستناك
مجموعك ف الثانويه
لو فوق تسعين ف الميه
او حتي ان شلت مواد
عمره ما هيقيم عقلك
ولا حتي نهاية العالم
ولا حد نقص ولا زاد ..
متقولش خلاص اتقفلت
والدنيا بحالها اسودت
اهي سنه قضيتها ف عمرك
وخلاص دلوقتي اهي عدت
متقولش حياتك وقفت
ولا حتي الحلم اتبخر
الخير متشالك دايما
وهيجي لو كان متأخر
الجاي بتاعك كله
بالحلو وبرده بمره
بس انت متستعجلش ..
صدقني هتدخل جامعه
تتمني نجاحك صافي
وتعدي السنه متشلش ..
ده لان نجاحك كله
ف الحاجه اللي انت حاببها
مش درجه زياده ف ماده
تتمني ان انت تجيبها ..
ياما ناس وياها شهاده
قاعدين علطول ع القهوه
والعمر اتسرسب منهم ..
عجزوا وانتهو علي سهوه
وفيه ناس حاوت ف حياتها
مقالوش احلام بتضيع
جددوا احلامهم تاني
وابتدوا يفتحوا مشاريع
وفيه ناس كملوا واجتهدوا
او ذاكروا وخدوا كورسات
واشتغلوا وظايف عاليه
دلوقتي صحاب عقارات
انت اللي باديك تنجح
بطريقه جديدة تناسبك
وتكون بتحاسب نفسك
من غير الناس ماتحاسبك
والوقت ان جاب او ودي
كلها درجات ف الماده
والثانوي خلاص اهو عدي
والعمر بحاله معاك ..
بس انت تعيش بتحاول
والحلم هيستناك