تجاعيد
انا امتي هعيش من غير تجاعيد ؟
والخوف هيبطل يلقاني!
انا بهرب ديماً من حيرتي
والحيرة تملي ملحقاني!!
انا نفسي اقول اني اتحسنت
محتاج افرح واقول " خفيت "
لكن برجع ديماً للصفر
وبشوفني قصيدة " انا مليت "
محتاجة اطمن واكتب اني خلاص ف امان
محتاجة انسي " قصيدة حلوان "
محتاجة اشوف الناس بوضوح
او ان الحب في عينهم ليا يكون واضح
من غير ما اخاف اكتب تاني علي نص " فراقك مش فاضح "
محتاجة افرح واطير واتشاقي واكمل حلمي بدون احزان
محتاجة اشوف الباقي في عمري مهوش بهتان!
محتاجة اكتب ميت نص عشان
اخرج من حزني ولو ساعتين عشان اعرف انام
انا عارفة الراحة بتبقي حظوظ!
لكن في " نوفمبر " قولت كتير " انا قلبي عجوز "
بتمني اعيش يومي وسني
واقول " النص مهوش عني "
عندي " شيزوفرنيا " وخوف مزمن من كل الناس
وتعبت حقيقي اجاوب علي مالها عنيكي !؟
ف كتبت قصيدة كانت بتقول " مني اليكي "
وواجهت الظلم بقوة بنت رافضة المُعناه
ف قابلته وعيشت معاه حكايات خلتني اقوله
" يا عوض الله "
مقدرش اعيب فيه بكلامي
علشان كان اطيب قلب حقيقي
وكان لي حياة ، لكن أقدار
ونصيب متشال ومحدش عارف فين الخير
لكن محتاجة الاقي في عين الناس ليا حب وتقدير
محتاجة الحزن اللي ف عيني ميبقاش متشاف
محتاجة اطمن للدنيا وابطل اخاف
تحديداً بدأت رحلة توهه وحيرة وخوف " من سنة "
ف " رفعت ايديا بحزن غريب ورفعت عيني للسما "
وطلبت عون من ربنا علشان تعبت
ف كتبت له اني حقيقي " اشتقت له "
وحاولت اكتم خوفي وابطل أبوح
ف لقيت يوميها الحبر تبت في الأيدين
ف كتبت ان " ناقصني روح "
وكتبت ان القلب داب من البهدلة
ف لقيتني جوا في وحدتي ببكي بأنين
ف كتبت ساعة فجر وفي عز المطر نص " الحنين "
وصحابي لما اتخلوا عني في شدتي
وزادت مخاوفي ووحدتي
كلمت غايب في القصيدة كأنه انا وقولت لي
" وحيد جداً مفيش اشخاص بتبقاله
حزين زي اللي ساب قلبه
وجاله الغدر واغتاله "
مأذيتش حد لكني بدفع في التمن !
ضاقت اوي ف كتبت ان " الحب ليه لا يؤتمن "
ولان اصعب حرب " الحرب مع ذاتك "
حاولت اهرب من الوجع بالنوم
وصحيت لقيت الحلم عمال يتبري
والعمر زي القطر بيسبقني وجري
وتعبت من كتر السباق!
ف اتفقنا نخلي بالنا من اتفاقنا
ف كان طبيعي يزيد فراقنا
لما قولت مفيش فراق
واما سيبت القلب ليه
ف لقيتني
"كل ما اقول ، هنسي انسي اني عايزة انسي وارجع احن إليه"
وحاولت اقول ان الذكريات فاتت
ف كتبت
" بكرة لما يقولوا ماتت كل شئ هتحسوا بيه "
لكن محدش حس بالمُعناه!
وشافوا حزني في القصيدة
وكتبوا ليا " الله "
وسابوني وحدي بشكي حزني بعيد
ورجعت اكتب اني لسة " وحيد "
واكتب قصيدة جديدة دلوقتي
واسأل سؤالي !
امتي هعيش لحظة بدون تجاعيد !