عطشان يا رب
عطشان يا رب
ميت يا رب من العطش و فـ ايدي زمزم !
و جعان اوي مع اني متعشي بلحوم
شهواني جدا رغم كوني عفيف
بريء و طيب رغم اني مُخيف
حريف أبان عكس اللي جوايا
انا الوحيد عـ الارض من طينك
ميشوفش نفسه لو وقف قدام مرايا
لكن بشوف المظلومين مني
ماسكين حبال المشنقه واقفين ورايا
انت المعين من رحمتك تخلقلي عين
ماتشوفش تاني قسوتي شيطان رچيم
أنا مش شيطان لكن جبان و ضعيف اوي
ميت يا رب من العطش نفسي ارتوي
مش عاوز اشرب مايه لأ عطشان حنان
عطشان موده و رحمة مع صوت الاذان
مش صوت مذيع الراديو و اللعب الحرام
عطشان مشاعر مش كلام
انا اصلي شاعر مش رخام
الضرب فيا يهدني مش حمل ضرب
عطشان يا رب
أنا أرض بور لكن صبور مستني فيض
أمطار كتير تروي الجذور من رحمتك
عشمان يا رب في جنتك كتروا الذنوب
دول مخدوعين ضحك الوشوش
انت اللي عالم بالقلوب
الحبل ضاق و الرقبة مش حمل العذاب
الدنيا ضاقت زي خرم الباب
وانا فيه بعيط مـ العطش
او مـ الألم
او مـ الضمير
من أي شيء
خلّي ما بيني و بين دعايا حجاب منيع
أنا نفس ادوق التين يا رب
مليت أسِّف من الضريع
مش حمل طوق الامنيات
ولا وزني خف الريشه يعني عشان أطوف وقت الطوفان
ولا عندي نوح أركب معاه
ولا عندي حوت اتداري فيه
ولا عندي صبر المحسنين
ولا عندي جيش اتحامي بيه
انا وحدي جدا بين ضحايا الاسئلة
ولا عندي تبرير للكلام
ولا عندي حل المشكله ..