الراحمون يرحمهم الله
اتفق الأب مع سواق التوك توك انه يودي أولاده المدرسة ويجيبهم كل يوم وبعد كام مره للأولاد مع السواق يسأل الأب الإبن الأكبر ..
أيه الأخبار ياحبيبي مرتاحين مع السواق الجديد
الأبن .. هو مواعيده كويسه بس بيجيب ابنه اللي عنده سنتين يركبه معانا
الأب .. نديله فرصه جايز كان عنده ظروف اليومين اللي فاتوا .. بعد فترة يسأل الأب الابن فيعرف ان السواق مازال بيركب ابنه مع ولاده فيقرر يكلم السواق .
الأب متشكرين يا ريس الأولاد مبسوطين منك 
السواق .. شكرا يا باشا دول حبايبي 
الأب .. هو انت بتركب طالب معاهم ؟ !!
السواق .. طالب تانى ؟ 
..
..أكيد تقصد ابني ..
لا يا باشا ده عنده سنتين بس متعلق بيا خالص لأن مراتى توفاها الله من سنه ونص
وبعدين العشة اللي انا ساكن فيها مش متقفله كويس فبخاف اسيبه لوحده الصبح .
هو مدايقهم يا باشا ؟
الأب .. لا أبدا بالعكس ده انا افتكرته وانا بكلمك لأن الولاد بيحبوة جدا
حتي اشتروله هدوم وألعاب هديه فقلت اسألك هو ابن مين عشان توصله الهدية ..
خلاص هخلي الولاد يدولك هديته انت بقي
السواق .. شكراً ياباشا يارب تفرح بيهم
