إبنى وماأملك
إبنى وأعز ماأملك
حته م القلب الجوانيه
بعيد عني ولا بقربى حبى
وحنانى ليك حاجه تانيه
أنت مش بس ماأملك أنت
بقلبى حاجه غير عاديه
برغم انك مش فى
ولادى الوحيد
لكن كنت بكدب فى نفسى
شوقى اللى كل يوم بيزيد
تكون دى مشاعر زايده لأنك
آخر العنقود وحقك عليا كتير
ولا هى تناغم روحانى وقلق
من شراهة الدنيا وموت الضمير
ولا كان حقك فى حاجات
كتيره وعندى جانب التقصير
رد عليا كلمنى صدقنى سؤال
جوايا مش لاقى ليه تفسير
حتى تلاقينى قبل ماأمشى
لازم اودعك بأجمل القبلات
محدش فينا يابنى ضامن الحيا من الممات
بس عايز أنصحك بنصيحه
خليها ثابته زى الحلق فى ودانك
من فضل الله عيشتكوا حلال من
عملى والدنيا شاهده قدامك
على قد ما تقدر عيش إوعاك
تضعف يوم وتطاوع شيطانك
ياما عدت علينا أيام و الدنيا
وراها ايه غير تعبك وازعاجك
أنشف وكون قد المسؤوليه
الناجح ميعشى فيها فاقد الهويه
إصنع نفسك كون صاحب شخصيه
إوعاك تعيش وسط الناس هفيه
وإزرع فى نفسك الثقه وكون
مع ربنا هتعيش حياه طيبه وهنيه
هيخليك وسط الناس
ليك كيان وفى عينيهم مستور
هوا فيه أجمل من كدا طالما
بترضيه هيكون معاك رب غفور
لإننا مش ملايكه ولا
معصين من المعاصى والذنوب
على قد ما تقدر ماتبعدش عن ربك
بالطاعه وكلنا بنرجع نتوب
دايما ترجع ليه فى كل حياتك
مش شرط تكون غالب أومغلوب
ربنا كبير وعادل مابين
لحظه وثانيه يحنن عليك القلوب
على قد ما قدرت قولت النصيحه
نصايحى فيها واضحه صريحه
عشان فى يوم لو جاتنى المنيه
أحس بيك وأنا فى برزخى
فعلا تستحق تكون الحته الجوانيه
مهى الروح صعدت لربها ف السما
بس بتحس بحبايبها
إنهم مضايقين ولا عايشين الهنا
ومتنساش تبقى تعدى عليا
تآخد بحسى القبر سكنته ضلمه
لو بتحبنى إسمع كلامى
يارب برحمتك ابعدنا عن الضمه
خلى دعاءك ليا يابنى بالرحمه
كلنا هنحتاجه وهيعملنا ونس ولمه
نضمن شفاعة ربنا وسط القبور
وندعى يوم العرض بعدم المزله
**