صورة ع الغلاف
نفسي ديما الأقيها تلاوعني
انا وهى في حالة اشتباك
تقول تحب ومعاك تلوعني
ذنبي ايه اتعذب انا وياك
على هجر الحبيب تلوميني
لا ده عدل ولا ده انصاف
خديني في حضنك ضميني
مش تسيبيني بحالة اعتكاف
بعد ماتصعبت بينا الأمور
بقينا بحالة فيها أستحالة
حوالين بعضينا نلف وندور
ياريت كل منا يروح لحاله
فضلنا على كده فترة
صبحنا من بعضينا بنخاف
جتلنا انا ونفسي فكرة
ليه مايكنش بينا اعتراف
عشان كده عملنا إتفاق
أي حد منا يمر بمحنة
يحن للحب أو يشتاق
مانقولش أنت نقول إحنا
مع بعض إيد واحدة
مش لازم نعمل احلاف
ماحنا جسد وروح واحدة
ملناش اطماع ولا أهداف
أنا ونفسي ادينا اتصالحنا
بعد طول خصام وبعاد
من العتاب واللوم ارتحنا
بعد صراع مرير وعناد
اتعهدنا نفتح صفحة جديدة
ونبعد عن أي خلاف
نقرب بيها دنيتنا الجديدة
بعد حرمان سنين عجاف
ننشرها بصدر الجريدة
صورة جميلة نرسمها ع الغلاف
***