دموع
تحت شجر التوت
قاعد أنا مستني
وفراشات الزرع طايره
وانا بدندن واغني
حورية من الجنة
عنيها بحر غريق
رجليها فيها الحنه
خدودها لون الجمرة
خلخالها له رنه
لابسه منديل بؤويه
بقها خاتم سليمان
جمالها يا ناس رباني
شفتها بقيت سكران
اختفت بعيد عن عيني
وكاني كنت نايم
وفضلت افكر فيها
وقلبي يا ناس هايم
وبعد كام يوم
رايح للارض ارويها
قبلتني في الطريق
، وعيني جات في عنيها
خطفت قلبي معاها
وعشقت تراب رجليها
وقلت يا رب تبتسم
لقيتها بتداريها
وعدت في لمح العين
وقلبي كان حزين
وقعدت افكر فيها
سهران والناس نايمين
وكل مناي اشوفها
لو حتي لدقيقتين
لكن اتكتب علي
اعيش في شوق وحنين
والحزن دق بابي
في يوم م جلها عريس
وعشت مع جراحي
من غير شعور واحاسيس
طلبوني للتجنيد
ولبست يوم دخلتها
ودموعي علي عيني
وهي رايحه لبيتها
فضلت ادعي واقول
يتمم ربنا فرحتها
ويقويني علي الي جرالي
وانسي في يوم ضحكتها
**
للشاعر / فتحي عتمان