آخر محاولات الهروب
كان كل شيء حواليك بيوحيلك
إن النهاية فاضلّها أمتار
الضلمة بتغطي المكان .. علشان
مفضلش من ضحكَك نهار
هتموت خلاص !
فِكرك مريض مبقاش بيخرج من محيط الرآس
محبوس فِـ دايرة ، والجميع حُراس
خوفك وعجزك والقدر أجراس
بيزيعوا فـِ عينيك القلق ...
هتموت خلاص !
كان دا الشعور اللي إتخلق ...
شوفت الأمل عابر سبيل أعمىٰ
والدنيا أضيق من ممر الحَلَق
ومفيش فـِ كادر الرؤية غير عين التُرب
الخوف هنا رابط إيديك
والليل هرب
والشمس جاية بضيَّها تقبض عليك
والحزن أهو
واقف بيزرع فدانين فـِ عينيك
ومفيش فِـ جسمك نص سنتي سليم
وبقيت لوحدك يا إبراهيم . !
عمال تعاتب ف القمر يحضن سمَاك
وأهو كل ما يقرب عليك، شمسك تِضله
ومفيش معاك
غير جسمك المنحول وضِله
ولا قد بهدلة النهار ولا قد حِمله
بتشد ملك الموت عليك وبتبتسم لُه
فـ يعدي جنبك من سكوت ويشد غيرك
تايه فـِ نفسك والفراق بقى خط سيرك
مبقتش تتخطى الحواجز والخساير
وبقيت تخاف لـَ تكعبلك فِلل السجاير
وبقيت تخاف لـَ تكعبلك ..
وبقيت تخاف ..
تبدر تقاوي الفرح تطرحلك عِجاف
وبقيت تخاف ..
الخط يفضح رعشتك والحبر جاف
فـَ بقيت بتكتب بالرصاص
هتموت خلاص ...!
مش كنت عيل من يومين ؟؟
بتنط سور المدرسة ، وبتتني كُم المريلَه
كان كل همك فـ الحياة إنك تحل المسألة
1×1يبقوا كام ؟
بتحل واجبك مـ العِشا وتدخل تنام
كبرت معاك الأسئلة
وبقيت بتسرح فـِ الصلاة
مبقتش عارف مين إمام ..
وبقيت بتسهر والسهر يدخل ينام
من بعدها إسودت عينيك
والليل هرب
والشمس جت تحكم عليك
" يتوفى رمياً بالرصاص "
هتموت خلاص ؟
وهتبقى دي نهاية المجاز !!
طب مين هيبقى لـ ضهر أبوك عكاز ؟
ومين هيبقى لوالدتك ضِل وغطا
شِعرك شريك المرمطة .. والنوم فـِ أحضان الرصيف
وأخوك شريك الأرض ونصاص الرغيف
والحلم لما يكون كفيف .. يطرح ممات
هيودعك صمت المباني والأوكر والبوابات
والكراسي الساكنة جوا البلكونات
والدموع اللي بكيتها لحد مات .. هتودعك
هتودعك أرض الملاعب والعُرض تأمن أذاك
كلهم مبقوش مَعاك
كلهم مبقوش مَعَك !
حتى ودن الحيطة رفضت تسمعك