عيدنا هل وجاي بوشه
كلّ مرّه العيد بييجي
بلقىٰ نفسي رجعت عيّل
شغفي بيه مليان لآخرُه
مهما خفّ وبان قُليّل ,,
أجري على أمي وأميّل
تِطبَع البوستين كفوفها
عيد .. عيدين .. عشرين يعدّوا
مِش بتِكمَل غير بِشوفها ,,
طوفت فِ الدنيا وبطوفها
قعدتي مع ابويا رحله
فِ الحكاوي ياخدني واسرح
بين زمان وازاي كان احلى ,,
بلقىٰ قلبي كإنه نحله
ضيف تقيل لو مين يهِشُّه
يلمَح اللمّه الجميله
يبتسِم ويصُبّ عِشُه ,,
عيدنا هَلّ وجاي بوِشُّه
طعمُه بالأحباب مسكّر
مهما شيبت وشَدّ عودي
فرحتي بالعيد بِتِكتر ,,
والحكايه بتحلىٰ أكتر
لمّا غالي يدُقّ بابنا
ضحكتين مِ القلب نابُه
واحنا مايفوتناش منابنا ,,
يجري بينا الوقت,, سابنا
لسّه ماشبعناش كلامهُم
عيد .. عيدين .. عشرين يعدّوا
والحنين مِتشال عشانهُم ,,
كل عيد محفوظ مقامهُم
مِتشالين جوِّه ف وريدنا
لو تِكِّل الأرض بيهُم
راح نشيل عَ الراس يا سيدنا ,,