ألم الفراق
من يومين عرفت ان الوقت بينسي
وبيعالج وان الغياب مفعولة اسرع م الاذي
لو زاد غيابك هنسي بسهولة الونس
وانا طبعي علي قد المحبة والاشتياق
قادرة اني اعالج نفسي من ألم الفراق
وبالأخص
لو كنت صادقة في كل شئ
وفضلت اضحي بكل شئ
وما شفت من قلبك رجا
بمشي وانا ناسية ولكن
سايبه فيك كل الفضا
وانا واللي زيي بننسي لما مبنلاقيش
تقدير قصاد عمر انقضي
وان الفراق مش صدفة دة حكمة وقضا
وان اللي فات م العمر مش هين عشان
نرمي اللي جاي كمان
مع شخص ساب جوانا
ميت توهه ومضي
اول متاهه بتجبرك تنسي
انك تدور ع الدليل ع حبه ليك !
وانك تخاف انك تقول خليك !
وانك تشوف عمرك بيخلص
وانت بتدور عليك !
وانك تلاقي ميت سبب بيقولك امشي
وانت مُصر تمدله ف ايديك
وانك بتنزف طاقة ومشاعر
وقصاد عيوبه قفلت بردو عينيك!
انا قولت مرة الحب لو بيذل متحبوش
وانا جاية أقول ركز ف اخر كلمة بس
وأقصر طريق الشر من بدري
ومتحبوش !
الحب مش كل الحياة
الحب بيوقف حياة
الحب جُب هيدفنك
لو عوزت تتأقلم معاه
والوقت لو سرقك وسبقك
هتعيش حياتك دون حياة
سبحان مقلب القلوب
بعد الغياب وسنين من الخوف والفراق
حاولت أتحسس ملامحه بعيني بس محسيتوش
حسيت كإني معرفوش !
كل المشاعر اختفت
وسألت نفسي بدهشة وبحيرة
ازاي مشاعري اتحولت رغم اللي كان جوايا ليه!
وازاي سلامنا محستوش ولا حتي من لمسة ايديه
حسيت كإني شايفة حد انا معرفوش!
ولقيت عينيا رافضة لو تلمح من عينيه
ازاي وانا ف غيابه كنت هموت عليه!
وكتبت له في عشرين قصيدة اني هستني اللقا!!
واما التقينا سألت نفسي ، قلبي مبينبضش ليه!!
ف عرفت يومها ان البعاد دة علاج
وانك عشان تنسي اللي فات
محتاج تبطل الاحتياج
وان الحياة بتستمر ومبتقفش
وان اللي فات بيسيب علام
والقطر مش هيفوت مادام
قررت تلمح بس حلمك في الطريق
وعشان تعيش ابعد ومتبصش وراك
كمل طريق الحلم واتنفس نجاح
واقفل علي قلبك بميت مفتاح
وانسي اللي فاتك وابتدي المشوار
كل اللي جي هيبقي خير
بس لو خدت القرار .