انسان ٱلي
مقدرش اعيش من غير الحزن اللي في عيني
فبلاش يوميا تقوليلي في عيونك حزن
احزان العين مبيعرفهاش انسان عادي
لكن بسهوله يقدرها بياع البُن
مش طالب منك حنيه اصل انا شبعان
انا طالب منك احساسي بإن انا انسان
في الشغل الناس مش سايبيني
فبقيت مش بشعر غير اني
كـ الترس فْـ ألة بدون إحساس
ومعاكي وبس بحس اني
انسان له قلب
بيحب و يكره و يعيط و يموت مـ الضحك
طب أقولك شيء من غير ما تقولي عليا عبيط !!
امبارح واحد صاحبي غشيم
عمال بيهزر ويايا و انا مخي مع المكنه اياها
مش حاسس ان اييديه التلمه
ماسكه الولاعه بتحرقني
وانا سارح جدا مع حزني
مبقولش الـ أه
بصيت في عنيه و هو أستغرب
ازاي مش حاسس حرق النار
بصيت علي ايدي و علي قلبي و فهمت الفرق !
القلب اتهري من كتر النار مش بس الدق
ربنا وحده العالِم بيا
العالَم فكرني ضحيه
بالمعني الحرفي مش التشبيه
دبحوني في ليلة العيد لكن من دون سِكّين
دبحوني فراق / تريقه / إحباط وانا كُلّي يقين
إن أنتي معايا و هنعدي و هنكمل بعض
متعشم خير أنا بوجودك
علشان وياكي بشوف نفسي
اللي انا متاكد ان أنتي
شايفها جميلة كما عيونك
مش زي الناس ما هي شايفاني
او زي ما بشوف دايما حالي
إنسان يا محمد و لكنك
انسان بمجاز انسان ٱلي