أخر أخبار قصيدة موحشتنيش
مفيش حد بينزل بوست الساعة ٨ الصبح بس بنزل البوست حالاً عشان انهيت كتابة القصيدة اللي هكلمكم عنها دلوقتي ، فضلت أهرب اكتر من سنتين من كتابة قصيدة زي موحشتنيش واخيراً اقدر اقول انها خلصت بكل المشاعر الحقيقية اللي فيها وهتكون علي مسامع حضراتكم خلال ايام قليلة ، في كل مكان يخصني علي الميديا القصيدة دي اللي قررت ارجع بيها لكتابة الشِعر مرة تانية ولأميرة اللي كانت تايهه بقالها سنتين بتعمل اكتر من حاجة ف نفس الوقت هروباً من كتابة الشِعر ، شفتوني وانا بعمل فيديوهات كوميدية وشفتوني وانا بمثل وانا بغني شفتوني بقالي سنتين وانا بعمل كل حاجة إلا اني اكتب شِعر ، وعشان كدة من ايام قليلة دخلت حذفت كل الفيديوهات الكوميدية اللي كنت عملاها عشان مكنتش انا مكنتش اميرة البيلي اللي عرفتوها وحبتوها كنت بهرب من نفسي ومن مشاعري ومن ان الشِعر بيوجع صاحبه اكتر ما بيلمس الناس ، لإني بعريلك مشاعر وحزن وفترات ضعف وانكسار ممكن تشوف انها ابداع ولكن من رحم الوجع والفترات الصعبة بيتولد الابداع دة " موحشتنيش " هتكون رجوعي للشِعر ولحلمي من جديد وبداية جديدة لمجموعة قصايد تُعتبر فضفضة حقيقية مطلعتش بالساهل ، بوعدكم إن القصيدة دي هتكون متفصلة لكل واحد فيكم وبتناسبكم كلكم بتناسب الجاني والمجني عليه هتشوف نفسك فيها وهتشوف شخص اذيته فيها وهتشوف شخص أذاك فيها وهتقوم وتقع وتقوم في القصيدة اكتر من مرة ودة لإني للمرة الاولي بعد سنتين أرجع لنفسي واواجهني باخطائي ومشاعري وعيوبي وشغفي وحبي في مجموعة قصايد هيكون بدايتها
موحشتنيش .