عالم سمسم
شكراً نم نم شكراً فلفل
شكراً خوخه وخاله خيريه
عم حسين أبو ضحكه تجنن
عمنا جرجس و العسليه
شكراً جداً علمتونا
نصْفىَ إزاى و نصَفىِ النيه
شكراً جداً علمتونا
إمتى نهزر/إمتى بجد
شكراً جداً عرفتونا
تبقي إزاى الصُحبه الجد
شُفنا معاكم وإتعلمنا
نوعد يبقى ننفذ وعد
علمتونا إزاى بنعِد
خرجتولنا الضحكه الصافيه
ومانزعلش فيوم من حد
مهما الوضع يرخم حاله
مديون ليكم جيلنا بحاله
عندى إليكم بس سؤال
عالم سمسم فين عنوانه ؟
انا لفيت الدنيا بحالها
ليه مالاقتش جنينة الورد
ليه مالقيتش الخاله خيريه
ليه مالقتش الأبله نبيله
ولا دُكان بيبيع عسليه
هيأتُلنا العالم جنه
وإن حياتنا حياه ورديه
وإن الدنيا دى كحكه بسُكر
بدله و جايه مقاسها عليه
أنا ماقصدش أعاتب فيكم
أنا كان قصدى و بس أقول
كان مالافضل نعرض أزمه
و نحُطلها بجد حلول
ضاع العُمر فى قُلنا وقالو
ماتو يقولو وعِشنا نقول
إنتو عالمكُم صح أكيد
وإحنا عالمنا أكيد مغشوش
إنتو الخلق الصافيه الدافيه
وإحنا الخلق اللابسه و شوش
إحنا حقيقى ما نتعاشروش
ضللتونا شويه و لكن
نمنا بنحلم نضحك نرسم
بس حقيقى بفخر بقول
شكراً جداً عالم سمسم