عادي جدا
تبقي مرميه في سريري
شامه ريحتي
ماسكه ايدي
حاسه نبض القلب جوه
بس لما لساني ينطق
اسمها و يقول بحبك
تغلطي برضك في اسمي
و تقوليلي بأسمه هو
..
ما أحنا الاتنين غلطانين
انتي كنتي ضحية ساذجه
لشخص سابك من سنين
جيتي ليا لاجل أكمل
حاجة فيكي لسه ناقصه
أما انا عربيد برخصه
قلبي بار مش بار باهله
بار لكل السكرانين
عيني بتوزع معاكسه
كفي بيدلدق حريم
بس لسه في قلبي حته
فيها شيء م الطيبه باقي
حب من ٣ ابتدائي
بنت حبيتها بغباء
حبها كان ليا حكمه
بالظبط زي الإبتلاء
..
مش بايدي
كل واحدة اعرفها سوشيال
تبقي مِلكي
ببقي عايش دور اخوها
فجاة بتحول عشيقها
عشت بلعن كل add
يوم بعته عشان اخونك
او أخونها
هي راحت و انتي باقيه
صورة بالكربون
لا يمكن يوم اصونها
و انتي برضو
م انتي لسه بتغلطي
لسه قايله اسمه و انتي
عايشه فيا جوه حضني
كل مره بتهمسي في وداني ببقي
حاسس انك مش معايا
بس احساسك ياخدني
و انسي انك ملك غيري
واني برضك ملك غيرك
في الخيال
هي دايرة و كلنا بنلف فيها
مركز الدايرة الفراق
نص قطر الدايرة هو النصيب
في بشر علشان نعيش
للاسف لازم تغيب .