مش ده مكاني
وكإني سافرت سنين ورجِعت
مش ده مكاني
ولا دي مشاعري
ولا شكلي اللي انا فيه دلوقت
بتمنَّى انِّي ماكنتش افَكَّر
وأعيش عادي
وأشوف الشيء زي ما هِوّ
مش شيء تاني
مش روح وكيان
أصنام تتنفِّس حواليا
أفكار بتشوفني وتندهلي
من طين ولسان
الندهة من الخوف زلزال
كان ممكن يبقى شعور وقتي
وهيخلص بعد دقيقة يادوب
مش يبقى جدور
عمّالة بتتمدد فيا
وبتبني الشجر اللي حاضِنِّي
بقوالب طوب
يِتقل قلبي
أتقَل أكتر
وأشوف جناحات الطير أصدَق
خفافيش بتحُوم !
إيه جاب التخدير النِصفي
لملاك الموت ؟
إيه جاب النعش اللي انا شوفتُه
لسرير عادي
مفتوح عـ الدنيا ومتسَلَّط في عينيه النور
ما سألتش ولا دكتور عن لِبسُه الِاسوِد
مع إن النبش اللي فـ رِجلي
كان نبش قبور
ودخولي الأوضة على الكرسي
كان عجز صريح
عرِّيتني مخاوفي كإنها ريح
وانا كنت تراب
شخص بكِبري
يتشال .. يتحَط
ويوَقَّعوا منه رصيد البنك
ويحُطوا مكان الفايدة دُعاء
ماقدَرش أجادل دلوقتي
ولساني تقيل تُقل الداء !
بـ ابكِي وبـ اضحَك
وبقول لُه يا رب
أرجوك لو شِئت تنَجِّيني
اِطرُد مع دَمي اللي هيِنزل
فلسفتي الفاضية وخليني
أبسَط مِنِّي
إنسان عادي
بشعور عادي
بيشوف الشيء زي ما هِوَّ
وبيِقلَع شِعرُه المرَّادي !!