سكريبت حسن الظن
بيشوف بوست لواحد ما يعرفوش ، بيعلن عن حفل زفافه وبيسأل عن مكان يأجر منه عربية للزفة ، بيحاول يتعاطف معاه بس هو مش فاكر مين الشخص ده أصلاً، بيلف يقول لصاحبه اللي قاعد جنبه :
- أنا مش عارف إيه كل الناس اللي عندي دي وما أعرفهاش ولا أعرف ضيفتها امتى ؟!
= يا عم أنفريند واخلص ما توجعش قلبك
- ما أنا هعمل كدة فعلاً
بيفتح الأكونت بتاعه عشان يعمل له أنفريند ولكن بيقرر إنه يبُص على الرسايل الأول عشان يتطمن ان مفيش حديث سابق بينهم، عشان يلغي صداقته وقلبه متطمن، ولكن ..
ايه ده ؟؟ ايه كل الرسايل دي ؟
١٤ سبتمبر ٢٠١٧
كل سنة وانت طيب وبخير وسعادة ، عقبال سنين في طاعة ، مبسوط اني عندك في قائمة الأصدقاء 🪷
- وانت طيب وبخير ، الشرف ليا أنا والله 🙏
١٧ أكتوبر ٢٠١٧
ألف سلامة عليك ربنا يتم شفاك على خير ، لو محتاج حاجة ابعت لي ، ابقى طمنا عليك 💕
بيلف لصاحبه يوري له الرسالة وهو مندهش ومتفاجيء : دي وقت ما كنت داخل اعمل العملية !!
١٤ سبتمبر ٢٠١٨
كل سنة وانت طيب وبخير وسعادة
عقبال ١٠٠ سنة وانت بخير ونجاح دايمًا 🌷
١٥ ديسمبر ٢٠١٩
ربنا يفك كربك ويفرج همك، انا عارف انك في ضيقة وحبيت أقول لك إني دعيت لك عند الكعبة 🕋
١٠ يناير ٢٠٢٠
ألف مبروك صدور روايتك الجديدة أنا من أول الناس اللي اشتريتها وبجد الكتاب تحفة.. منتظر توقيعك بس 💫
١٤ سبتمبر ٢٠٢١
كل سنة وانت طيب وبخير وسعادة يا صديقي العزيز أنا عارف انك مختفي بدعيلك يارب تكون بخير ، انا بحبك في الله ومش ببطل ادعيلك 💞
بيلف لصاحبه تاني : أنا ما شوفتش الرسايل دي ، والله العظيم ما شوفتها ، ازاي أنا مش عارف ولا فاهم !! أنا مش عارف أرد أقول إيه ؟ وازاي أنا ما كنتش فاكره رغم إننا اتكلمنا قبل كدة ، هي الدنيا لاهيانا اوي كدة ؟
بيخرج من الماسينجر ويرجع تاني للبوست اللي بيعلن فيه عن ميعاد فرحه وبيكتب له :
- ألف مبروك يا صديقي العزيز ، ربنا يتمم لك بخير مبسوط إن عندي حد أصيل زيك في قايمة الأصدقاء ، وجه الوقت اللي أحاول أسعدك زي ما أنت بتسعدني بوجودك طول الوقت ، أنا عملت أجازة يوم فرحك وهبقى معاك بالعربية من الصبح BMW 320i موديل السنة لو مش عجباك أجيبلك عربية تانية أحسن ، وهدية مني رحلة أسبوع ليك انت والعروسة في المكان اللي تختاروه ، مبروك عليكم يا بختها بيك وبقلبك الجميل ويا بخت اللي عنده صديق مخلص زيك ♥️
بيلف لصاحبه تاني وهو مبتسم :
- في حاجات كتير اوي بنشوفها وناخد انطباع ونصدقه ونلاقي اللي يعيننا عليه وانطباعنا بيكون غلط ، وسعات بنعيش ونموت واحنا آخدين انطباع غلط عن حد ونبقى متخلين إننا صح ، عارف ربنا سبحانه وتعالى بيقول : " فَضُرِبَ بَيْنَهُم بِسُورٍ لَّهُ بَابٌ بَاطِنُهُ فِيهِ الرَّحْمَةُ وَظَاهِرُهُ مِن قِبَلِهِ الْعَذَابُ " ، الآيه دي مش بس بتبين مشهد في الآخرة ، لأ دي اسلوب ومنهج حياه ، حاجات كتير بنشوفها من بره وِحشة ومش عاجبانا وهي مفيش ألين ولا أطيب منها ، ساعات تلاقي واحد متجوز واحدة مش جميلة وتلاقيه بيقول فيها شعر ، مش لازم انت تكون شايف الجمال اللي جوة الإنسان من برة بس ممكن تكون معيشاه في جنة ، هي الدنيا كدة ساعات ترتضي حاجة ابتغاء وجه الله فيكافئك بأجمل مما كنت تتصور ، حقيقي وعسى أن تكرهوا شيئًا وهو خيرٌ لكم ، المهم مش عيب إنك لما تكتشف إنك كنت غلطان إنك تعترف بكدة وتصلح الغلط ده بأي شكل يُرضي الطرف التاني .
بيلف لصاحبه تاني يلاقيه مسبهل ومتنح له :
- ولاااا بقولك ايه ما تتنحليش كدة
= عايز إيه طيب ؟
- انت أجازة الخميس الجاي وهتيجي معايا الفرح ومن النهاردة ده صاحبنا الثالث ووقت ما يحتاجنا يلاقينا ، آمين ؟؟
= آمين ♥️