متر و نص | بقلم محمد عبد الفتاح
و هي الدنيا ايه يعني
رصيد مـ الستر والصحه و راحة البال
متفاته
محدش فينا هيجمع فلوس علشان
يموت بيهم في قلب شوال
هتعمل خير
تلاقي الخير
هتعمل شر تتعاقب
ملاك الموت مبيسميش
ملاك الموت ده بيراقب
و كتفك فيه عليه ملكين
رقيب بيسجل الحسنات
عتيد بيسجل السيء
هتمشي هتمشي والله
محدش فيها بيخلد
عشان الدنيا متفاته
صحاب فدادين و اخرتهم
في متر و نص
واغني الاغنياء ماتوا
و سابوا التركه للاولاد
ما دايم الا وجه الله
فـ عيش و ارضي
وصلي و ادعي فـ السجده
بحسن ختام
تقيله الشيله و الايام
و في احلام
يجوز نفسك تحققها
هتتحقق اكيد لما
بكل ايمان تصدقها
و عيشها خفيف
تفوتها خفيف
حياتك زي سحابة صيف
علي الدنيا
لا محور كون لحد انت
ولا غيابك هيفرق شيء
بسيطه و سهله والله
رساله و جاي تأديها
فـ أديها بهدوء و سلام
مفاتش كتير و لا باقي الكتير لكن
محدش ضامن الايام .. !