عمرو حسن | للمرة الأولى - بعد إذن الستّ
الليل وسماه ونجومه وقمره
قمره وسهره
نقط وانا
كان فيه كلام مكتوب هنا بس اتمسح ومالوش اثر
راح ويا عمري اللي انهدر
راح ويا شيء فيا اتكسر
الخوف وانا
الشوق وانا ؟
الليل وسماه ونجومه وايه
والبعد اللي اتعودت عليه
والركن اللي هربت اليه
جربت كلام الكون كله
مش فاضل غير كلمه وحيده
بس بعيده
بتلخص عمري اللي فنيته
بين قرب وبعد وخوف وهنا
ولقيت أي كلام ينفع يتقال
الا انت وانا !
ازاي اوصفلك ياحبيبي ازاي
بعد ماسبتك عشت ازاي
كنت مكان البكا ف العين
كنت مقام الصبا ف الناي
كنت بعيش تأثير ادمانك
بخلط فقدك على فقدانك
عشت بقلب نفسي عشانك
ف نشيد السكر والشاي
انا ارجعلك ؟
تاني اسمعلك
ده انا لو أطول القلب اللي شفعلك
كنت هعاقبه على استقبالك
خدت الفرصه اللي اتمناها ميت انسان ف الدنيا بدالك
ده انت الصوره اللي باخدهالك
كان حبي بيظهر جواها
اديتي الذكرى تفكرني
واديتك أيام تنساها
الواحد كان قلبه ف ضيقه
كان غرقان ف نزار قباني
كان مخطوف ف البر التاني
هات يامحبه وهات يا أغاني
عقله ف تلج وقلبه حريقه
الواحد كان قلبه ف ضيقه
الواحد كان معمي وشارد
متسوح بين صعب ووارد
متورط ف القلب البارد
والنظره اللي بتبدو بريئه
الواحد كان قلبه ف ضيقه
وانا قاعد عمال أتمنى
واقنع ف الأيام واستنى
قلبي ف نار وخيالي ف جنه
شايف وهمه متاح وحقيقه
الواحد كان قلبه ف ضيقه
يادي ياقلبي الوهم الزايف
معمي وجمهورك بقا شايف
عاوز ينصح لكن خايف
لقصيدتك تنهار ف دقيقه
الواحد كان قلبه ف ضيقه
كل أغاني الحب جميله لحد ماتتعلق ف جريمه
والدنيا الللي احنا بنحياها
غير اللي بتطلع ف السيما
فيه ناس تستاهل نخسرها
وفيه ذكرى بايدنا نغيرها
وفيه اشخاص لما بنختارها
بنقل المركز والقيمه
النغم رجعت حلاوته لقلبي وفضلك قساوته
والهوى اللي هان عليا ابتديت تعرف غلاوته
كنت متشعلق ف قلبي
وكنت مهزوم من غباوته
النهارده الحب والشوق والحنان
والزمان قبل المكان
والحبايب والقرايب والنسايب والجيران
كلهم شايفين رجوعي لما سبب الجرح بان
قولت عادي
فيه صباح فواح ونداي
فيه ليالي جميله جايه
فيه حاجات وضحت ف عيني كت بعيده من شويه
فيه مكان يتراح واحبه
فيه فرح يسكن عنيا
اللي تاه ف الصحرا فتره شاف ف اخر الدرب ميه
بعد اذن الست عندي
جمله فاضله اغنيهالك
صوتها يفضل طيف محاوطك كل مامريت ف بالك
حاجه اغلى من حياتي ومن جمالك
ليه بتتجنى كده ع الحب ليه
حب ايه اللي انت عشت تقول عليه
حب ايه .