مشروع الجواز
اهلا بيكو كل معجبي شريك الحياة - فى تانى حلقه من برنامجنا وبرنامجكم اتجوز صح
معاكم احمد وجيه مؤسس مدرسه اتجوز صح اول مدرسه تطوعيه لتاهيل الشباب للزواج ومحو الاميه الزوجيه بالمجان
اتكلمنا الحلقه الى فاتت عن الجواز والنهارده هنتكلم عن
مشروع الجواز ..
نجيب الموضوع من اوله
انت عشان تفتح اي مشروع هتعمل ايه ؟؟
اكيد هتقولى هعمل دراسة جدوى وهشوف المشروع هيكلفنى كام وممكن تقولى هسأل اهل الخبره في المجال ده ، وممكن تقولى هاروح اخد كورس كمان
لان احنا بندفع فلوس كتير ومش عاوز اخسر كل استثماري ووقتي ومجهودي ...
طب لو جينا نتكلم بقى على الجواز
هل هو مشروع ؟
رأيكم ايه ؟
الجواز الناجح يا جماعه هو أهم مشروع في حياتكم
لاسباب كتيرا جدا .
منها :
- الزواج السعيد يعني حياه سعيده
- الزواج الناجح بيصنع أشخاص ناجحين وأسر وأطفال ناجحين
- الزواج الناجح يساوي علاقة نفسيه عاطفية روحيه راقيه بشكل يومي
- الزواج الناجح هو طريقكم الأكبر للجنه أن شاء الله
يبقا لازم نستوعب كويس اوي أن الزواج اهم مشروع في حياتنا
لازم المشروع ده بالذات يتدرس كويس
ومتهيألى لازم انك تتعب اكتر فى دراسه جدوى الجواز عن دراسه جدوى المشروع المادي العادي.
انت قلت دراسة جدوى الجواز ؟؟
هو الجواز ليه دراسات جدوى !!
ايوه طبعا انت متعرفش ؟
للاسف احنا كلنا بنعمل دراسة جدوى الجواز بس من الناحيه الماديه بس
هنجيب سرير, دولاب, اوض نوم, معرفش ايه, هيكتب مثلا الجنيراتور (مولد الكهربا) بقى دلوقتي بيتكتب في القايمه, صينى وتيفال وسيراميك، وحاجات كتير جدا بقت بتكتب في القايمه للي بيكتبوا قايمه
بس انت اصلا مبتكتبش حاجه تانيه مهمه جدا
اللي هيا انت اصلا مؤهل للجواز ولا لا ؟؟
زي ما قلت في حلقه امبارح هل انت مستعد لمواجهه التقلبات اللي هنتكلم عنها في ال 30 حلقه ولا لا ؟
التقلبات اللي اكيد هتقابلكم في الجواز وفي الخطوبه كمان
لو مش مؤهل ليها
نصيحه منى ..
متتجوزش احسن
سؤال بسيط : عشان تسوق سياره هتعمل ايه ؟؟
جواب : هتروح تاخد ( تدريب ) عند حد سواق وحد ميكانيكى بيفهمك طبيعه العربيه وازاى تتعامل معاها فى كل المواقف ..
بالظبط الجواز كده
لازم تبقوا عارفين الحاجات الأساسية عن الجواز اللي تخليكو تعرفوا تسوقوا العلاقه الزوجيه بشكل سليم لازم تسأل حد من اهل الخبره ..
ومش شرط ان يكون حد عارف وخلاص ممكن يكون حد عارف بس عارف معلومات غلط
فانت هتتجوز على المعلومات الغلط دى
يعنى مثلا لو رحت لميكانيكى وقالك لو العربيه سخنت منك امشى بيها اكتر علشان تلحق مشوارك مثلا
فبالتالى انت هتلاقى العربيه سخنت اكتر ممكن تولع بيك فمش شرط ان عارف وخلاص المهم عنده خبره صح ، فلازم تاخد خبره من حد متمكن واهل ثقه
ولو ركزت هتلاقيك علشان تشترى عربيه او موبايل حتى بتقعد الاول تشوف انت عاوز امكانيات عامله ازاى ومش بس كده ده كمان تكون مناسبه ليك ف السعر واقتصاديه ف البنزين وتكلفه صيانتها وبتقعد تفكر وتحسب ميييييييييت مره ف ما بالك بقا لو هتتجوز وبتدور على عروسه متهيالى لازم نتأنى اوى نفكر كويس اوى ومش اهي جوازه والسلام
ومش عاوزكم تحطوا ف دماغكم ان الجواز هدف مجرد ما وصلتوله خلاص
خصوصا البنات
لا . .
الجواز وسيله ...
زى الى ف التعليم بيبقى فاكر ان التخرج هدف
مع ان التخرج هو وسيله لحاجات كتير ف الحياه العمليه زى الشغل
لازم نتعب علشان تكمل سعيد ف حياتك
زي ما بقي اي حد من الخريجين الجداد عايز يشتغل سنه و يبقي مدير ومفيش استعداد للتعب و للدراسه و للجهد اصلا
علشان تبقى مدير ف شغلك لازم تتعب وتترقى ومش هتترقى الا بشغلك الكويس وتعبك ده
برده الجواز كده مش هتترقى فى قلب شريك حياتك الا بالمواقف والأخلاق والصبر والدعم و المراعاه والموده والتعب علشان الاسره تكون سعيده
في الحلقه ديه هدفي اني اقنعك أن الزواج ده مشروع حياه
وأنه اهم مشروع في حياتك
وعشان هو اهم مشروع لازم تكون محضر له و عامل دراسه جدوى و مؤهل ليه
وهو ده دورنا في باقي حلقات دوره تأهيل المقبلين على الزواج و المتزوجين
وبكده نكون وصلنا لنهايه الحلقه التانيه من برنامج اتجوز صح مع صفحه شريك الحياة - أدهم و جيسى
استنونا بكره فى نفس المعاد ومع الحلقه التالته اللي هنتكلم فيها عن أحكام الزواج .
يعني ايه أحكام الزواج ؟
تابعونا بكره وانتوا تتعرفوا على تفاصيل مهمه جدا هتغير افكار كتير عندكم