ربنا عوضني
ربنا عوضني ونجاني
واداني حجات كات ناقصاني
واداني الشخص اللي وجوده
شال خوفي وحزني وطمني
قبلك انا كنت بخاف ديماً
وبشوف وياك الدنيا سلام
وبشوف في وجودك فرحة وخير
عوضت كتير من حزن زمان
واديتني الحب اللي انا عايزاه
وعرفت معاك ايه عوض الله
كنت انت هدية وخير ليا
وافراح جاية وحزننا رمناه
خليتني اقول للعُمر يضحك من جديد
خليتني اشوف اليوم معاك وكإنه عيد
خليتني احس بإني قبلك كنت تايهه
وبدأت الاقي فيك دليل رحلة وصديق
حسيت معاك ان اللي جي هيبقي خير
حسيت أمان ملمحتهوش من عمر فات
ولقيت ونس للقلب من بعد الوجع
ولقيت حياة بتضحكلي بس معاك
بتحط إيدك علي الإلم ف يخف
ف رجعت اثق في الحب من تاني
ولقيت بُكايا بدأ يزول ويجف
بحبك بس مش هقدر
اقول كل الكلام علشان
حبيبي الشِعر قدامك
بسيط وإن قولت الف ديوان
وهعمل ايه عينيك .. خطفوني ولقتني
بروح وياك في كل مكان
وشاعر اه
كبير وله كلمة والله ..
لكن باجي قصاد عينك
بلاقي الشِعر يتراجع ويرفع راية استسلام
عرفت حبيبي اني بحب وبريدك
عرفت الفرحة علي ايدك
لقيتني بدوب إذا سمعتك تقول اسمي
" اميرة " معاك
وملكة ومالكة كل الكون وانا وياك
اقولك سر : عينيك حلوين !
" وأمروني احب الحب "
واسمع اغنيات الست
لأول مرة احب الليل
واحب اني اشوف اسمك في تليفوني
واتابع كل اخبارك بلمعة فرحة ف عيوني
واقول للناس خلاص " هو"
هعوز ايه من الحياة وانت " قصاد عيني "
وماسك ايدي ومتبت
عينيك لو كلمتني صحيح انا والله بتثبت
وهعمل ايه!! مهوش بإيديا امنع قلبي يتنهد إذا قربت
ولا هقدر اكمل بس كام ساعة بدون صوتك
بحب حتي في سكوتك !
عرفت تاخدني من حيرتي واحزاني
وتخطف قلبي وتاخدني بدون إنذار
عرفت يا حلو تخطفني
ف ادوب واحتار
لأول مرة اتخيل معاك بيتنا
واشوف وياك حياة وأمان
واشوف نفسي جميلة وحلوة بالفستان
واسمي ولادنا واختارلك هتلبس ايه؟
بحبك طب وهكدب ليه
واخبي واتداري في مشاعري
مفيش غيرك قدر يجعلني
اكتبله غزل في كلامي وفي شعري
بقولك وسط كل الناس
مليش غيرك، معاك قلبي
معاك كل اللي بتمناه
وهستني عشان انت اللي تستاهل
اعيش العمر وايديا ف حضن ايديك
حبيبي إن عيشت بكتب لك
كلامي كله ما يكفيك
قدرت احب نفسي معاك
قدرت تشوفني من جوا
لقيتني فجأة بتطمن
واقول للناس خلاص " هو"