ربنا عالم باللي مابينهم
في الزمن الشينْ والناس بتنفسِن وبوشّين
بقا عادي نطارد سر الناس
ونقسّم أرواحنا لصفين
ربنا عالم باللي مابينهم واللي كاسرهم
والأمر مابيخصش ف الكون غيرهم
مش شغلك ولا شغلي نفتِّش ف حاجات حصلوا
ولا شغلك ولا شغلي نفتِّش ليه انفصلوا
تدعيلهم من قلبك دايماً بصلاح الحال
والسر اللي مابينهم يهدى ويتبدّل عال
أحسن ما انت بتحشر نفسك ف كلام براك
اللحظة لا ناقصه تطفُّل منك ولا ناقصاك
والكلمة الوحشة بتقتل وتهد وتغتاب
ف بدون ماتراجع ف الأسباب
وبدون ماتجرّح لوم وعتاب
نتمنى الجي يكون أجمل لجميع الناس
ولمره وحيدة تكون انسان
انسان وخلاص .