سجين الحياة
.jpg)
السكة مدهونة بيبانها خوف
الرحمة محبوسة ورا القضبان
الورد راح من عنيه الشوف
والضحكةمهزومة ورا الجدران
الطير برئ وقع منة الريش
أحلامه مش قادرة على الطيران
نفسي استخبي في حضنك
والمس ضفايرك
و هتعمل إية فى نفس مقتولة
الأحضان
دوامة زي الريح تهزك
و تتوة مراكبك لامرسي ولا شطان
تعشق خيالها تشدك تهدك
تضحك في وشك تغشك
وتموتك حيران
قومي إفتحيلي الباب ورجعي روحي
انا مش أسير ولا قلبي من العميان
نفسي استخبي في روحك
وارمي جروحي في جروحك
وتلبسيني تاني عباية الإنسان
في رقتك وفي بحرك الواسع
ربيع يا مية العطشان
في ضعفك حتى في قسوتك
وجوة عنيك بر امان
أشواقي سيل بتهزني وطايحة كالبركان
صعب اني اعيش وابتسم
وعيونك متسلسلة بالكسرة والاحزان
نفسي استخبي بعيونك
وارجع رضيع في كونك
بدونك كل الجناين رملة
كل البشر أحزان
**